مراجعه‌ی بیماران افغانستان به اوزبیکستان افزایش یافته است

رسانه‌های اوزبیکستان گزارش داده‌اند که شمار شهروندان افغانستان مراجعه‌کننده به مراکز صحی این کشور در سال ۲۰۲۵ به‌ گونه‌ی چشمگیری افزایش یافته است. بر اساس آمارها، میزان مراجعه بیماران افغانستان در مقایسه با سال‌های گذشته بیش از ۱۵ برابر رشد را نشان می‌دهد.

به گزارش روزنامه‌ی «کاسپین پست»، از جنوری تا نومبر ۲۰۲۵ بیش از ۸۰ هزار بیمار خارجی برای دریافت خدمات صحی وارد اوزبیکستان شده‌اند؛ هرچند آمار دقیق بیماران افغانستان به‌طور جداگانه اعلام نشده است. شهروندان افغانستان می‌گویند نبود تشخیص دقیق، تجهیزات معیاری و دسترسی محدود به خدمات پیشرفته صحی، آنان را ناگزیر به مراجعه به کشورهای دیگر ساخته است.

پس از مسدود شدن مرزهای افغانستان و پاکستان و محدود شدن سفر بیماران به آن کشور، بسیاری از بیماران افغانستان که پیش‌تر برای تداوی به پاکستان و هند می‌رفتند، اکنون به کشورهای آسیای میانه از جمله اوزبیکستان روی آورده‌اند.